Mykoza vaginale, si ta parandalojmë dhe trajtojmë

Kozeta Mustafaraj, obstetër-gjinekologe

Mykoza vaginale është variant i vaginitit (inflamacioni i vaginës) i karakterizuar nga irritim i vaginës, kruajtje dhe rrjedhje vaginale. Kandidoza prek vaginën dhe hyrjen vulvare. Pothuaj 3 në 4 gra referojnë se kalojnë të paktën një infeksion mykotik gjatë jetës së tyre. Mykoza vaginale nuk konsiderohet si infeksion seksualisht i transmetueshëm, megjithëse funget, që janë shkaktarët e saj, përhapen nëpërmjet rrugëve oro-genitale, për arsyen e thjeshtë që funget gjenden normalisht në vaginë, por rriten dhe japin sëmundje në kushte të caktuara.

Simptomat mund të variojnë nga të lehta në më të shprehura, duke përfshirë:

• Kruajtje dhe irritim të vaginës dhe të hyrjes vulvare.
• Ndjenjë djegieje, sidomos gjatë urinimit dhe gjatë marrëdhënieve seksuale.
• Skuqje dhe ënjtje të vulvës.
• Dhimbje vaginale dhe tensionim të indeve përreth.
• Rrjedhje vaginale e trashë e bardhë, pa erë me pamje si gjizë.

Komplikacionet shihen:

• Në rast të përkeqësimit të shenjave të mëparshme, sikur: skuqje e fortë dhe e shtrirë, ënjtje e shprehur, kruajtje që çon deri në gricje të mukozës (fisura) apo plagë sipërfaqësore.
• Infeksion që përsëriten deri në mbi 4 herë në vit.
• Infeksioni mykotik që shkaktohet nga tjetër lloj veç candida albicans.
• Kur gruaja është shtatzënë
• Nëse vuan nga diabeti i pakontrolluar
• Në rast rënieje të imunitetit nga përdorimi i disa lloj medikamentesh apo infeksioni HIV

Kandidoza është infeksion mykotik i shkaktuar nga kandida, një mikroorganizëm i pranishëm normalisht në vaginë, së bashku me baktere të tjera. Në gjendje natyrale vagina përmban një përzierje të balancuar bakteresh dhe kandida. Laktobacili që jeton normalisht në vaginë, pengon mbërritjen e mykut në vaginë. Nëse prishet balanca e këtyre organizmave në vaginë, do të ketë rritje të mykut.

Shkaktarët më të shpeshtë të prishjes së këtij ambienti janë:

• Përdorimi i antibiotikëve (ulin sasinë e laktobacilit në vaginë dhe prishin pH e saj).
• Shtatzënia dhe çdo gjendje që shoqërohet me shtim të sasisë së estrogjenit në organizëm.
• Përdorimi i kontraceptivëve oralë ose zëvendësuesve hormonalë.
• Diabeti i pakontrolluar
• Sistemi imunitar i dëmtuar, nga përdorimi i kortizonikëve, infeksione të ndryshëm sikur HIV.
• Çdo gjë që ndryshon tipin dhe sasinë e baktereve, që gjenden normalisht në vaginë, sikur dushet vaginale të shpeshta, irritimi nga lubrifikues të ndryshëm.
• Aktiviteti seksual, edhe pse nuk konsiderohet seksualisht e transmetueshme, mund të shërbejë si rrugë hyrëse e kandidës.

Diagnoza vendoset gjatë ekzaminimit pelvik, ku shihen ndryshimet e mukozës vulvare dhe vaginale, prania e sekrecioneve. Nëse infeksioni është i përsëritur, duhet të merret tampon vaginal për të bërë ekzaminimin mikroskopik dhe kulturën e materialit të marrë.

Në rast se partneri ka shqetësime, duhet të mjekohet edhe ai ose marrëdhëniet të jenë të mbrojtura me prezervativ. Shpeshherë mund të përdoren edhe medikamente alternative, si:

• Acidi Borik në formë supozitorësh në format kronike që nuk i përgjigjen terapisë.

Kosi i përdorur për përmbajtjen e laktobacileve orale apo vaginale nga shumë gra, nuk është i aprovuar për përdorim kurues.