BURRAT E MARTUAR KANË NIVELE MË TË ULËTA TË TESTOSTERONIT SESA ATA QË MBETEN BEQARË… DHE STRESI I TË QENIT BABA MUND TË JETË ARSYEJA, ZBULON HULUMTIMI.

Hulumtimi ka zbuluar se meshkujt e martuar kanë mesatarisht testosteron më të ulët se ata që mbeten beqarë – dhe është e mundur që stresi i të pasurit familje të jetë përgjegjës.

Analiza e 11 studimeve shkencore që përfshinin më shumë se 25,000 burra zbuloi se ata që janë të martuar ose në një lidhje kanë nivele mesatare më të ulëta të testosteronit.

Është interesante se ky ishte veçanërisht rasti në studimet që shqyrtonin burrat e moshës së mesme, dhe më pak tek burrat e moshuar.

Studiuesit që bënë analizën thonë se “kjo mund të pasqyrojë streset e jetës familjare, duke përfshirë fëmijët në familje”.

Ka prova nga hulumtimet e mëparshme se përjetimi i stresit mund të zvogëlojë sasinë e testosteronit të prodhuar nga meshkujt.

Por ky është vetëm një shpjegim i mundshëm pasi analiza nuk ishte krijuar për të përcaktuar nëse baballarët mund të fajësojnë fëmijët e tyre për më pak testosterone.

Është e paqartë se sa mund të ndikojë tek ata rënia modeste e testosteronit e parë tek burrat e martuar, të cilët kanë ende një sasi normale të hormonit.

Megjithatë, meshkujt me testosteron anormalisht të ulët janë gjetur më parë se kanë një epsh më të ulët dhe luftojnë më shumë me lodhjen.

Dr Bu Yeap nga Universiteti i Australisë Perëndimore, i cili udhëhoqi analizën, tha: “Një zbulim interesant ishte se burrat e martuar, ose burrat në një marrëdhënie de facto, kishin nivele pak më të ulëta të testosteronit sesa burrat beqarë.

“Një shpjegim i mundshëm mund të jetë se burrat e martuar me familje mund të jenë më të stresuar, dhe për këtë arsye kanë nivele më të ulëta të testosteronit, por studimi ynë nuk ishte krijuar për të parë më tej këtë rezultat.

Vitet e fundit ka pasur më shumë një fokus në ‘menopauzën mashkullore’ – ku nivelet e testosteronit te meshkujt bien ndërsa rriten.

Analiza e re, e publikuar në revistën Annals of Internal Medicine, nuk gjeti një ndryshim të rëndësishëm në përqendrimet mesatare të testosteronit tek meshkujt e moshës 17 deri në 70 vjeç.

Por pasi burrat mbushën 70 vjeç, niveli i tyre i testosteronit priret të ulet mesatarisht.

Studiuesit filluan të shqyrtojnë faktorët e stilit të jetesës, si të qenit i martuar apo beqar, të cilët mund të ndikojnë në testosteronin përveç moshës.

Ata zbuluan gjithashtu se burrat që bënin jo më shumë se 75 minuta aktivitet fizik të fuqishëm në javë kishin mesatarisht testosterone më të ulët se burrat më aktivë.

Nivelet e testosteronit ishin gjithashtu më të ulëta te meshkujt me peshë më të lartë, bazuar në indeksin e masës trupore (BMI).

Përqendrimet më të ulëta të testosteronit kanë qenë më parë të lidhura me një rrezik më të lartë të zhvillimit të diabetit dhe demencës, dhe me gjasa më të larta për të vdekur herët.

Përqendrimet e testosteronit u zbuluan gjithashtu të ishin pak më të ulëta te burrat që ishin duhanpirës, ​​krahasuar me burrat që nuk kishin pirë kurrë duhan, dhe te ata me presion të lartë të gjakut dhe me një histori të disa kushteve shëndetësore, përfshirë sëmundjet kardiovaskulare.

Autorët thonë se këta faktorë duhet të merren parasysh përpara se burrave t’u thuhet se kanë testosteron anormalisht të ulët.

Provat e mëparshme kanë treguar se meshkujt shohin një rënie të nivelit të tyre të testosteronit kur presin një fëmijë, dhe meshkujt, testosteroni i të cilëve bie më shumë, investojnë më shumë tek fëmijët e tyre dhe marrin më shumë kënaqësi nga të qenit prindër.

Burimi: DailyMail/ Përshtati në shqip për JoTabu.al: Anjela Hajdari