Rikthimi në shkollë! Këshilla për përdorimin e maskave nga fëmijët

Ndërkohë që verës po i vjen fundi dhe përballja me pandeminë COVID-19 vazhdon, prindërit duhet të informohen mbi përdorimin e maskave nga fëmijët ndërsa ata rikthehen në shkollë.

Aktualisht studimet mbi përfitimet dhe dëmet e mbajtjes së maskës nga fëmijët për parandalimin e përhapjes së COVID-19 janë të limituara. Ndërsa disa të dhëna sugjerojnë se fëmijët mund të jenë më pak të rrezikuar se të rriturit për t’u infektuar; disa të dhëna të tanishme sugjerojnë se kjo mund të variojë sipas moshës. Mbi të gjitha, duhet të merren në konsideratë si rëndësia e përdorimit të maskës për parandalimin e përhapjes së COVID-19 ashtu edhe rreziku potencial i mbajtjes së maskës nga fëmijët.

Organizata Botërore e Shëndetësisë dhe UNICEF kanë përpiluar një raport mbi përdorimin e maskave bazuar në rrezikun që shfaq tek fëmijët. Ekspertët rekomandojnë se përveç përdorimit të maskës, mbajtja e distancës fizike, higjiena e duhur e duarve, shmangia e prekjes së gojës, syve dhe hundës, dhe ajrosja e duhur janë shumë të rëndësishme për parandalimin e përhapjes së virusit. Më poshtë do të gjeni disa këshilla për përdorimin e maskave nga fëmijët të përpiluara nga ekspertë të fushës.

Këshilla për të përcaktuar nëse fëmija duhet të mbajë maskë:

1. Fëmijët deri në 5 vjeç nuk duhet të mbajnë maska pasi:

• Ndikon potencialisht në zhvillimin e fëmijës.
• Nuk arrin ta përdorë vetë maskën siç duhet.

2. Për fëmijët nga 6 deri në 11 vjeç, duhet të merren parasysh faktorë të ndryshëm, si:

• Intensiteti i transmetimit në ambientin ku fëmija po qëndron, në përputhje me rekomandimet e Ministrisë së Shëndetësisë.
• Sa i aftë është fëmija që ta përdorë siç duhet maskën, duke u mbikëqyrur edhe nga të rriturit.

3. Për fëmijët mbi 12 vjeç, mbeten në fuqi rregullat që zbatojnë të rriturit, sidomos në zonat ku virusi është shumë i përhapur dhe distancimi fizik nuk mund të arrihet, kur fëmijët janë në një ambient me të moshuarit apo në shkollë.
4. Për fëmijët që kanë sëmundje të tjera bashkëshoqëruese, çrregullime në zhvillim ose aftësi të kufizuara:

• Përdorimi I maskës nuk është i detyrueshëm dhe duhet të vlerësohet sipas rastit nga edukatori I fëmijës dhe/ose mjeku.
• Për disa fëmijë, mund të ketë një ndikim potencial në zhvillim psikosocial dhe të mësuarit, aftësinë për të komunikuar, kuptuar dhe shprehur ndjesitë, prandaj prindërit duhet të ndjekin këshillat e mjekut.

OBSH-ja dhe UNICEF-i e kanë përpunuar këtë udhëzim mbështetur mbi parimin që të “Mos Dëmtojmë Fëmijët”, duke njohur fazat e tyre të zhvillimit, mësimit dhe shoqërizimit.

Prindërit duhet të lexojnë gjithashtu me kujdes rekomandimet e dhëna nga Ministria e Arsimit për të përgatitur dhe edukuar si duhet fëmijët në përdorimin e maskës. Përdorimi I maskave mjekësore rekomandohet për fëmijët me sëmundje bashkëshoqëruese, ndërkohë që fëmijëve të cilët vuajnë nga sëmundje respiratore nuk duhet t’u kërkohet që të vendosin maska.

Maskat e fabrikës duhet të lahen dhe vendosen në një vend të posaçëm (në momentin që fëmija nuk e përdor), ndërsa maskat mjekësore mund të përdoren vetëm njëherë, prandaj rekomandohet që prindërit të furnizohen vazhdimisht me maska për përdorimin nga fëmijët sa herë të jetë e nevojshme.

Burimi: UNICEF

Përshtati në shqip: Blertina Koka